Exposición do traballo

O dia 7 de maio por fin tivemos a oportunidade de dar a coñecer o noso traballo da unidade didáctica aos nosos compañeiros e ao mestre. A través dunha presentación de PowerPoint destacamos os aspectos máis relevantes da mesma, empezando polo tema, a quén vai dirixida, a xustificación e competencias, os obxectivos, os contidos, a metodoloxía, os recursos que se utilizarán e a secuenciación das actividades. Dentro deste grupo de actividades atópase o deseño dun material didáctico a través do programa EdiLim.

Esta presentación non foi improvisada, de feito tivemos un par de reunións previas nas que se revisou todo o material, se distribuíron as partes entre os membros do grupo e fixemos varios simulacros de presentación para controlar os tempos de exposición e ver se había algún aspecto importante que se nos esquecese presentar.

A través das actividades EdiLim abarcamos a competencia dixital e de tratamento de información que nos permitirán estimular novos xeitos de aprendizaxe, a interacción cos compañeiros, a estimulación de destrezas cognitivas e sociais e aprendizaxes significativos. Dependendo do mestre que acompañe todo o proceso de e-a desta unidade didáctica como guía, poderanse facer diferentes agrupamentos entre o alumnado (grupos de 2, 3 ou toda a aula, incluso de xeito individual dependendo dos momentos, necesidades e dos recursos)

As actividades están deseñadas para traballar todas as competencias definidas na unidade didáctica, son actividades combinadas onde os/as alumnos/as atopan sopas de letras, textos, imaxes, crebacabezas para arrastrar e outros nos que hai que completar textos e incluso hai actividades con pictogramas pensadas para aqueles alumnos/as con trastornos de aprendizaxe do espectro autista.

Queremos sinalar que como grupo estamos satisfeitos de ter desenvolvido esta tarefa por todo o que supuxo para a nosa formación e aprendizaxe, tanto a nivel grupal coma individual.

Actividades LIM

O día 2 de maio cando xa pensábamos que tíñamos todo máis ou menos preparado  para facer unha proba final das actividades LIM atopámonos cunha serie de problemas á hora de visualizar a páxina dos enlaces externos, pois  non funcionaban. Despois de consultar varios tutoriales-web e falar con outras persoas sobre o asunto, non éramos quen de arranxar a situación. Decidimos enviar un m@il á persoa de contacto que atopamos a través de internet responsable do deseño da aplicación EdiLim. Cál foi a nosa sorpresa que un día despois facilitounos a solución ás cuestións plantexadas. 

Deste xeito puxémonos mans á obra e puidemos facer unha proba do funcionamento das actividades realizadas e respirar un pouco máis tranquilos. Aproveitamos para agradecer a celeridade e profesionalidade por parte dun dos deseñadores da aplicación Edilim en trasladarnos a solución aos nosos problemas, grazas F. Macías!!!!.

As actividades LIM serán unha ferramenta máis que nos permitirá comprobar se os/as alumnos/as adquiriron os contidos traballados e definidos para esta unidade didáctica.

As actividades

O día 30 abril a reunión xirou arredor das actividades a deseñar para a nosa unidade didáctica. Non foi un traballo sinxelo, mais ben todo o contrario, posto que xurdiron diferentes actividades a desenvolver pero houbo que discriminar moitas delas, pois críamos que non tiñan as características axeitadas para que os alumnos puidesen acadar os obxectivos e contidos definidos previamente.

O primeiro punto a ter en conta á hora de deseñar as actividades a traballar  é que se desenvolverán durante tres semanas e cada semana abarcará 4 sesións; teremos en conta que o rol do profesor na maioría das actividades será coma de guía ou moderador.

En entradas anteriores comentamos que iamos traballar con actividades LIM pero non todas as actividades corresponden a este formato, de feito, os integrantes do equipo de traballo decidimos que, partindo da realidade e dos coñecementos previos dos alumnos, desenvolveriamos en diferentes espazos actividades coma: 

• recompilación de textos e diferentes materiais,
• visionado de filmes,
• traballos en grupo,
• exposicións dos traballos en grupo,
• confección dun esqueleto con todas as súas partes,
• actividades LIM.

Obxectivos e contidos

A seguinte reunión do equipo do día 25 de abril xirou entorno á definición dos obxectivos e dos contidos da unidade didáctica que estamos a deseñar.

 

En canto aos obxectivos, empezamos a traballar cunha lista de obxectivos demasiado ampla e practicamente inabarcable polo que foi preciso reducila a un número que fose máis factible á hora de poñelos en práctica na nosa realidade. Finalmente os elixidos foron:

• Identificar as partes do corpo humano.

• Coñecer o esqueleto e os principais ósos.

• Recoñecer as principais articulacións.   

• Coñecer os principais músculos e as súas funcións.

• Discriminar os principais órganos internos.

• Identificar os sentidos e as súas funcións.

• Valorar a importancia do coidado da saúde.

• Observar as diferenzas e igualdades entre as persoas.

Nesta reunión tamén traballamos nos contidos da unidade didáctica. Levounos un tempo definir cales eran os contidos que nos interesaban que os alumnos adquirisen unha vez desenvolvida a unidade didáctica. Consultamos a lexislación vixente e outros materiais didácticos que nos deron algunhas ideas para decidir que era o que nos interesaba traballar. Decidimos que o alumno deberá identificar as distintas partes do corpo humano así como observar as igualdades e diferenzas entre as persoas e valorar os distintos aspectos que inflúen nunha vida saudable.

Desenvolvemento da unidade didáctica

Tendo en conta que na última entrada do blog vos deixamos unhas imaxes das actividades LIM, temos que dicirvos que con anterioridade a esta parte do traballo tivemos que centrarnos no desenvolvemento da unidade didáctica do corpo humano, que está dirixida a alumnos de segundo curso de educación primaria, e que foi parte do que traballamos na nosa reunión do día 21 de abril.

Tiñamos as nosas diferenzas e discrepabamos en canto ás competencias que se ían traballar. Finalmente acadamos unha decisión, que foi a de traballar as seguintes:

• Competencia no coñecemento e na interacción co mundo físico.

• Competencia en comunicación lingüística.

• Tratamento da información e competencia dixital

• Competencia para aprender a aprender.

• Competencia para a autonomía e iniciativa persoal.

• Competencia social e cidadá. 

Estas competencias aparecen recollidas no Decreto 1513/2006, do 7 de decembro, polo que se establecen as ensinanzas mínimas da Educación primaria.

Unificando criterios e concretando contidos

Continuando coas reunións previas á publicación deste blog, tivemos dúas reunións unha o día 4 e outra o 7 de abril. Na primeira delas recompilamos o material que cada membro do grupo presentou, concretamos as liñas de traballo que iamos desenvolver e distribuímos as partes do traballo que cada un de nós faría. Na segunda reunión empezamos a traballar o desenvolvemento da unidade didáctica e analizamos as actividades que se lle podían asociar e tamén traballamos na idea deste blog que, como podedes ver, xa é unha realidade.

No transcurso destas reunións tamén xurdiron distintos puntos de vista arredor do tipo de actividades e do traballo que se levaría a cabo, do tipo de enfoque que nos interesaba presentar, da variedade de actividades da unidade didáctica e das ferramentas TIC que empregaríamos.

Na seguinte reunión, o día 11 de abril, xa decidimos que desenvolveríamos actividades LIM que farán que a nosa unidade didáctica sexa moito máis atractiva para os pequenos aos que vai destinada e, por outro lado, reforzará o traballo das outras actividades que forman parte desta unidade didáctica. Deixámosvos unha mostra de imaxes das actividades LIM das que vos estamos a falar.

 

Traballo previo á publicación do blog

Este blog viu a luz o 14 de abril deste ano sendo froito de diversas xuntanzas anteriores que mantivo o grupo de traballo. Na primeira delas, alá pola metade do mes de marzo, decidimos cal sería a alternativa escollida que se corresponde co deseño dun material didáctico para Educación Primaria. Presentamos diferentes temas que cada un de nós propuxo e despois de deliberar se decidiu nesta sesión que o tema a desenvolver sería "o corpo humano".

A nosa segunda xuntanza, na semana do 24 ao 28 de marzo, notificamos ao noso profesor quen forma parte do grupo de traballo, o tema elixido, describimos o material que imos deseñar, a idade dos destinatarios e os obxectivos e contidos que se traballarán co material.